O Grao en Comercio nace da adaptación ao Espazo Europeo de Educación Superior da Diplomatura en Ciencias Empresariais, un dos títulos máis demandados na Universidade de Vigo e, tamén, polo conxunto da mocidade galega e española, e que goza de elevadas taxas de inserción laboral.
O éxito social e laboral dos estudos que imparte a Facultade de Comercio da Universidade de Vigo e a súa longa traxectoria crearon unha cultura e unha marca de prestixio que inflúen no modo en que esta deseña os seus títulos.
Os principios en que se apoia o deseño do Grao en Comercio son:
- A demanda social e laboral.
- A importancia outorgada á transversalidade.
- A tradición, a cultura e a marca da Facultade de Comercio.
- A formación integral do titulado/a que sume á sólida formación xeral dun título de empresa, a orientación pola actividade comercial da organización.
