Facultade de Comercio

Search
Close this search box.

Presentación

Desde 1920, a Facultade de Comercio da Universidade de Vigo formou miles de estudantes que contribuíron ao desenvolvemento de Vigo e da súa área de influencia e á competitividade das súas empresas. Hoxe, os seus titulados/as e os seus estudos gozan dun prestixio que facilita a inserción laboral das novas fornadas Xunto á Escola de Enxeñaría é a orixe da Universidade de Vigo, que actualmente ofrece tres titulacións universitarias de notable proxección laboral: o Grao en Comercio, o Mestrado en Comercio Internacional e o Mestrado en Dirección de PEMES.

A Facultade de Comercio está situada no Campus de Vigo, no centro da cidade, e conta coas súas instalacións repartidas entre o edificio central e o edificio anexo compartido coa Escola de Enxeñaría. No edificio central atópanse os seguintes servizos e instalacións: aulas, laboratorio de idiomas, aulas de informática, seminarios, salón de actos, delegación de alumnado, secretaría de alumnado, despachos de dirección, despachos de profesorado, cafetaría e sala de lectura. O edificio anexo dispón de aulas, laboratorio de idiomas, aula de informática, despachos de profesorado e biblioteca.

Ao longo da súa historia centenaria, o centro transformouse e mudou de nome sucesivamente. A inicial Escola Pericial de Comercio (1920-1932) converteuse en Escola Profesional de Comercio (1932-1972); coa incorporación ao eido universitario, chamouse Escola Universitaria de Estudos Empresariais (1972-2010) e, para adaptarse á lexislación vixente, denomínase agora Facultade de Comercio.